पाल्पा – सामुदायिक विद्यालयका प्रधानाध्यापकहरुको संस्था प्रिन्सिपल एसोसियसन अफ् नेपाल (पान) पाल्पाले जिल्लाको शिक्षाको गुणस्तर वृद्धिको लागि सरोकारवालाहरुबीच शैक्षिक सम्मेलन गरेको छ ।
पाल्पा जिल्लाका विभिन्न सामुदायिक विद्यालयका प्रअ तथा शिक्षकहरुको सहभागिता रहेको कार्यक्रमका प्रमुख अतिथि जिल्ला समन्वय समिति पाल्पाका प्रमुख टंकनाथ खनालले सामुदायिक विद्यालयबाट उत्पादन भएको विद्यार्थीहरु नेपालका हेरक क्षेत्रमा अव्वल रहेको बताउनुभयो । उहाँले विद्यालयको शैक्षिक गुणस्तर अभिवृद्धिमा सरकार, शिक्षक, प्रअ, अभिभावक र विद्यार्थीहरुबीचको समन्वय आवश्यक रहेको बताउनुभयो ।
उहाँले अहिलेको युग भनेको डिजिटल र एआईको युग भएकाले सिकाईलाई समय सापेक्ष रुपमा परिमार्जन गर्नुपर्ने त्यसका लागि शिक्षकहरु प्रविधि र विषयवस्तुमा निपुण हुनु आवश्यक रहेको बताउनुभयो ।
पाल्पाको शैक्षिक शाख र पहिचानलाई बचाउने गरेर यहाँका क्याम्पस र शिक्षालयहरुले विद्यार्थीलाई पठनपाठन गराउन सकेमा पाल्पा देशकै अव्वल शैक्षिक हब बन्न सक्ने खनालको दावी छ ।
यस्तै विशिष्ट अतिथि रम्भा गाउँपालिकाका अध्यक्ष विष्णु प्रसाद भण्डारीले स्थनीय सरकारको अधिकारको क्षेत्रमा आएको कक्षा १२ सम्मको शिक्षाको गुणस्तर, शिक्षकको पेशागत विकास र शैक्षिक उन्नयनमा पालिकाहरुले काम गर्नुपर्ने बताउनुभयो । उहाँले रम्भा गाउँपालिकाले पालिका भित्रका कक्षा ९ सम्म दिवाखाजाको व्यवस्थापन गरेको, प्रअलाई मासिक भत्ता प्रदान गर्दै आएको असल अभ्यास आदान प्रदानका कार्यक्रमहरु संचालन गरेको बताउनुभयो ।
शिक्षा विकास तथा समन्वय इकाई पाल्पाका प्रमुख प्रेमराज खरालले अहिले शिक्षाको अधिकार सबैभन्दा बढी स्थानीय सरकारमा रहेको प्रदेश सरकारले तालिमको काम गर्ने र केन्द्रीय सरकारले बजेट व्यवस्थापन र समन्वयको काम गरेको बताउनुभयो । उहाँले जिल्लाको शैक्षिक संस्थाहरुको गुणस्तर अपभवद्धिमा यस्ता कार्यक्रमले सहयोग गर्ने र कार्यालयका कार्यक्रममा समेत पानसँग सहकार्य गरेर काम गर्ने बताउनुभयो ।
सामुदायिक विद्यालयको व्यवस्थापन समितिको अध्यक्षहरुको तर्फबाट जनता माध्यमिक विद्यालयका अध्यक्ष भोजराज पोखरेलले सरकारले सामुदायिक विद्यालयहरुमा बजेट व्यवस्थापनमा कन्जुस्याई गर्ने गरेको बताउनुभयो । राज्य र नीति निर्माण तहमा रहेकाहरुले जवसम्म शिक्षा र स्वास्थ्यको अवस्था सुधार नहुँदासम्म अन्य क्षेत्रको विकास हुन सक्दैन भन्ने बुझ्दैनन तवमात्रै शिक्षाको विकास हुने र समाज समेत रुपान्तरण हुने बताउनुभयो । उहाँले जनता माविले विभिन्न नमुना कार्यक्रमहरु मार्फत शैक्षिक गुणस्तर अभिभवृद्धिको काम समेत गरेको बताउनुभयो ।
त्रिभुवन बहुमुखी क्याम्पसका प्रमुख टंक प्रसाद पन्तले पाल्पाको क्याम्पस र सामुदायिक विद्यालयको शाख बचाउन यस्ता शैक्षिक अन्तरक्रिया र कार्यक्रमले फाइदा पुग्ने बताउनुभयो । शैक्षिक केन्द्रको रुपमा रहेको पाल्पाको शैक्षिक छवि बचाउन क्याम्पसले विविए, विविएम र अहिले विएस्सी आईटी जस्ता नविनतम कार्यक्रमहरु ल्याएकाले सहयोगका लागि सबैलाइै आगह गर्नुभयो ।
दमकडा नमुना माविका प्रिन्सिपल तथा पान पाल्पाका अध्यक्ष मोहन प्रसाद सापकोटाले विद्यालयको सफलताको लागि गरेका कार्यक्रहरु, असल अभ्यास आदिको बारेमा बताउँदै शैक्षिक गुणस्तर वृद्धिको लागि अभिभावक शिक्षक र विद्यार्थीहरुबीचमा समन्वय र सहकार्य आवश्यक रहेको बताउनुभयो ।
प्रिन्सिपल एसोसियसन नेपाल (पान) लुम्बिनीका अध्यक्ष हरी प्रसाद घिमिरेले पानले सामुदायिक विद्यालयको प्रशासनीक शैक्षिक र समग्र पक्षको सुधारको लागि विभिन्न संघ संस्थाहरुको समन्वयमा काम गर्दै आइरहेको बताउनुभयो ।
मिदास एजुकेशनका फाउन्डर विश्वराज पंगेनीले पानसँग आफ्नो संस्थाले सहकार्य गरेर देशभरका सामुदायिक विद्यालयको शैक्षिक गुणस्तर वृद्धिको लागि काम गरेको बताउनुभयो । उहाँले अहिले प्रविधिको प्रयोगगरेर शिकाई सहजिकरण गर्न सकेमा समयको बचत, विद्यार्थीहरुलाई सिकाईमा केन्द्रीत गरी शैक्षिक उपलव्धी समेत वृद्धि गर्न सकिने बताउनुभयो । उहाँले आफ्नो कम्पनीले डिजिटल सिकाईको क्षेत्रमा २५ वर्षदेखि सरकारका निकायहरुसँगको सहकार्यमा कार्य गर्दै आइरहेको र आगामि दिनमा समेत सामुदायिक विद्यालयसँग सहकार्य गर्न तयार रहेको बताउनुभयो ।
शैक्षिक सम्मेलनमा विभिन्न व्यक्तिहरुले पाल्पाको शैक्षिक गुणस्तर वृद्धिको लागि प्रश्नोत्तर कार्यक्रम भुषालडाँडा माविका प्रअ राजेन्द्र बश्यालले सरोकारवालाहरुसीत संवाद कार्यक्रम गर्नुभयो । सरोकारवालाको जिज्ञासा समेत राखेको र जिज्ञासाको अतिथिहरुले जवाफ दिनुभएको थियो ।
प्रिन्सिपल एसोसियसन अफ् नेपाल (पान) पाल्पा जिल्ला अध्यक्ष मोहन प्रसाद सापकोटाको अध्यक्षता भएको कार्यक्रमको संचालन विष्णु प्रसाद सिग्देलले गर्नुभएको थियो । मिदास एजुकेशनले प्राविधिक सहयोग रहेको कार्यक्रममा सामुदायि विद्यालयका प्रअ, विभिन्न पेशागत संघ, संगठनका प्रमुख तथा प्रतिनिधिहरुको सहभागिता रहेको थियो ।
