गोपाल प्रसाद वश्याल, पाल्पा – जिल्ला सदरमुकाम तानसेनस्थित मोहन कन्या माध्यमिक विद्यालयमा एक दिने कानूनी साक्षरता कार्यक्रम शुक्रवार सम्पन्न भएको छ ।
जिल्ला सरकारी वकील कार्यालय, पाल्पाको समुदाय समक्ष सरकारी वकील कार्यक्रम अन्तर्गत आयोजित कार्यक्रममा जिल्ला सरकारी न्यायधिवक्ता चुरामणी पराजुलीले सहजीकरण गर्नुभएको थियो ।
न्यायधिवक्ता पराजुलीले कार्यालयको काम कर्तब्यको जानकारी गराउँदै फौजदारी सरकारवादी मुद्दामा सरकारको पक्षबाट बहस पैरवी गर्ने, सरकारी निकायहरूका लागि कानूनी सहायता परामर्श प्रदान गर्ने कार्य गरिरहेको बताउनुभयो ।
उहाँले देवानी र फौजदारी मुद्दाका अवधारणा प्रष्ट पार्दै फौजदारी अपराधका प्रकृति, कानूनी उपचार र प्रक्रियाहरू, अपराध पुष्टि भै फैसला भएमा हुनसक्ने दण्ड सजायँ र पिडितका लागि सरकारले प्रदान गर्ने सहयोगहरूका उदाहरणसहित प्रस्तुत गर्नुभयो । उहाँले बाल बिवाह, घरेलु हिंसा र महिला तथा बालिका हिंसाका प्रकृति, कानूनी सहायता, सुरक्षित र संरक्षित हुने उपायहरूका बारेमा कानूनी एवम् ब्यवहारिक ज्ञान प्रदान गर्नुभयो ।
मोहन कन्या माध्यमिक विद्यालयका ६५ जना छात्राहरू र १० जना शिक्षकहरू सहभागी यस कार्यक्रममा विद्यालयका प्रधानाध्यापक दिपक प्रसाद ज्ञवालीले धन्यवाद ज्ञापन गर्दै कार्यक्रमबाट अपराध नगर्ने र पीडित बन्न पुगेका अवस्थामा कानूनी उपचारका बारेमा जानकारी प्राप्त भएकाले छात्राहरूमा कानूनी साक्षरता तथा सुरक्षित जीवनयापनका लागि सचेतता बृद्धि भएको बताउनुभयो ।
