०९ कार्तिक २०७८
(Tuesday 26 October, 2021)

रमेश सुवेदी
काठमाडौं, ३ असोज 

अखिल नेपाल फुटबस संघ (एन्फा) ले आगामी राष्ट्रिय महिला लिगमा मोफसलका तीन क्लबलाई सिधै प्रवेश दिएको छ । 

एन्फाले यसपटक आयोजना हुने राष्ट्रिय महिला लिग-२०७८ का लागि पहिलो संस्करणको मोफसलका तीन क्लबलाई सिधै प्रवेश दिएको हो ।  न्युज कारखानालाई प्राप्त प्रतियोगिता नियमावलीमा तीन क्लबलाई सिधै राष्ट्रिय लिगमा प्रवेश दिएको छ । 

एन्फाले आयोजना गर्ने ‘उपमेयर कप २०६८ राष्ट्रिय महिला लिग छनोट फुटबल प्रतियोगिता’ ४ कात्तिकबाट सुरु हुँदैछ । राष्ट्रिय लिगको मिति भने तय गरिएको छैन । 

एन्फाले राष्ट्रिय लिगमा यसअघि तीन विभागीय क्लब (त्रिभुवन आर्मी फुटबल क्लब, एपीएफ क्लब, र नेपाल पुलिस क्लब) लाई सिधै प्रवेश गराएको थियो । जहाँ उपमेयर कपबाट चार टोली राष्ट्रिय लिगका लागि छनोट भएका थिए । 

एन्फाले आयोजना गरेको उपमेयर कपबाट गत सिजन वालिङ नगरपालिका स्याङ्जा, विराटनगर महानगरपालिका मोरङ, चन्द्रपुर नगरपालिका रौतहट, चौदण्डीगढी नगरपालिका उदयपुर राष्ट्रिय लिगमा छनोट भएका हुन् । 

राष्ट्रिय लिगमा खराब प्रदर्शन गरेको चौदण्डीगढीबाहेक एन्फाले अन्य तीन टोलीलाई यसपटक राष्ट्रिय लिगमा सिधै प्रवेश गराएको हो । प्रतियोगिता नियमावलीको परिच्छेद नम्बर २ को नियम (५) सहभागितामा भनिएको छ ।  

‘यस प्रतियागितामा अघिल्लो वर्ष ७ माघदेखि ७ फागुनसम्म एन्फा कम्प्लेक्स सातदोबाटोमा आयोजना भएको राष्ट्रिय महिला लिग-२०७७ मा सहभागी भएका चार पालिका टिम (वालिङ नगरपालिका स्याङ्जा, विराटनगर महानगरपालिका मोरङ र चन्द्रपुर नगरपालिका, रौतहट) २०७८ सालमा आयोजना हुने राष्ट्रिय महिला लिगमा सहभागीता जनाउने भएकाले यस प्रतियोगितामा सहभागिता जनाउन पाउने छैनन् ।’

एन्फाको याे नियमवलीसँगै आगामी राष्ट्रिय महिला लिग-२०७८ मा क्लब संख्या आठ हुने भएको छ । यसअघि सात क्लब थिए । 

एन्फाले उपमेयर कपमा सहभागी क्लबले अनिवार्य खेलाडीको दुर्घटना बिमा गरेको हुनुपर्ने र कोरोना खोपको पूर्ण डोज लगाएको वा ४८ घन्टा अगाडिको  आरटी वा पिसीआर गरेको रिपोर्ट पेस गर्नुपर्ने बताएको छ । 

यस्तै, एन्फाले प्रतियोगिता तयारी खर्च एक क्लबलाई ५० हजार रूपैयाँ दिने बताएको छ । उपमेयर कपको विजेताले पाँच लाख, दोस्रो हुने टोलीले तीन लाख र फेयर प्ले टिमले नगद ५० हजार रुपैयाँ पाउनेछ । 

यता, विधागततर्फ उत्कष्ट गोलरक्षक, डिफेन्डर, मिडफिल्डर, स्ट्राइकर र प्रशिक्षकले जनही २० हजार प्राप्त गर्दा एक उत्कृष्ट खेलाडीले ५० हजार रुपैयाँ पाउनेछ  । प्रत्येक खेलको वुमेन्स अफ दि म्याचले पाँच हजार रुपैयाँ पाउनेछन् । 

प्रतिक्रिया पोस्ट गर्नुहोस्

Your email address will not be published. Required fields are marked *